LAOAG CITY – Agtultuloy ti panagibunong ti Provincial Agriculture Office iti bin-i a mais ken dagiti bukbukel ti nadumaduma a klase ti natnateng kadagiti mannalon ditoy probinsia.
Segun ken ni Engr. Maria Teresa Bacnat, Officer In-charge ti nadakamat a pangopisinaan kangrunaan ditoy dagiti mannalon a saan a nakaala kadagiti para kadakuada iti kallabes nga “agri inputs distribution” iti nasapa a paset daytoy a bulan.
Imbatadna a paset daytoy iti kalikagum ni Gob. Matthew Marcos Manotoc a panangipaay ti gobierno probinsial ti Ilocos Norte ti naan-anay a suporta kadagiti mannalon nga agmula ti High Value Crops wenno HVC.
Maipalagip a malaksid kadagiti maimula a bukbukel ket kalikagum ti gobernador a matulungan dagiti mannalon kadagiti dadduma pay a kasapulanda kas iti abono, insektisidio ken pagpadanum.
Mainaig iti daytoy, gutgutiguten ni Bacnat dagiti mannalon ditoy probinsia nga agmula kadagiti High Value Crops a dakkel a makatulong a pangalaan dagitoy ti nayun a pamastrekan para iti pamilia.
