LAOAG CITY – Pinalagipan ni Provincial Agriculturist Mrs. Norma Lagmay dagiti mannalon nga isapsapa da a gapasen dagiti mabalinen a pagay usar kadagiti makina.
Daytoy ket kas paset ti panagsagana iti posible nga epekto ti Bagyo Rosita ditoy probinsya nangruna kadagiti pagtatalonan.
Segun kenni Lagmay, no maperdi pay dagiti namnamaen a pangsukat ti pinerdi idi ti Bagyo Ompong ket mabalin a marigatan dagiti kaprobinsyaan nga agkamakan iti umdas a kanen.
Inbatad na a masapol a no malpas a magapas dagti pagay ket rumbeng nga ipenpen iti natalged a lugar tapno maliklikan ti panagngisit ti irik gapo ta bumaba ti presyo na.
Kunana nga agarop 65 agingga iti 70 a porsiento pay laeng ti nagapas a pagay ditoy probinsya.
Kabayatanna, kunana a manamnama sakbay wenno kalpasan ti Nobyemre 15 ket malpas ton ti panagapit dagiti mannalon.
