LAOAG CITY – Kinumpirmaran ni Mr. Perry Martinez, mangidadaulo iti Metro Ilocos Norte Council iti gobyerno probinsyal nga awan pay nagpasada a provincial bus nga addaan ti ruta a Laoag-Manila vice versa.
Kuna na a ti Fariñas Transit pay laeng ti nakakompleto kadagiti kasapulan a dukomento idinto a ti Florida ken Partas saan pay a nalpas dagiti dukomento da.
Segun kenni Martinez, awan pay ti schedule ti panagbiyahe dagiti dua a Fariñas bus, basar iti listaan nga inpaay da iti MINC wenno iti slot nga inpaay ti LTFRB.
Inbatad na nga iti anyaman nga oras ket mabalinen nga agbiyahe ti nasao a bus transit.
Inlawlawag ni Martinez a ti Florida ket nakaschedule ti panagbiyahe da intono Biernes ngem awan pay ti dukomento na iti MINC kasta met iti Partas Bus idinto nga agpada nga addaan da iti permit iti LTFRB.
Mainaig iti daytoy, inbunannag ni Martinez a ti prosesso ti panangidissag dagiti pasahero nga LSI ken returning resident ket maibaba da iti border control idinto dagiti APOR ken turista a pasahero ket maiprosesso da iti ili ti Pinili.
Awan met ti nagbaliwan ti plete nupay 50 a porsiento ti naipalubos nga akumudaren dagiti pampasahero a bus.
Maipalagip a nangiyisyu ni Gov. Matthew Marcos Manotoc ti order seknan ti panagbiyahe dagiti provincial buses idi Enero 31 ita tawen.
