LAOAG CITY – Maisayangkat inton bigat ti Provincial Civil Society Summit babaen ti Department of the Interior and Local Government.
Segun ken ni Atty. Gerald Gallardo, Provincial Director ti nasao nga ahensia, napilida nga isayangkat ti nasao nga aktibidad iti ili ti Vintar.
Inbatadna nga adda ti inimbitaranda a representative ti tunggal 23 nga ili ken siudad tapno makipartisipar.
Inlawlawagna nga adda dagiti government agencies a mangipresentarto kadagiti serbisio nga ipapaayda tapno mapakaammoan dagiti Local Government Units a mabalinda a gundawayan dagitoy kas ti accreditation ken registraion.
Malaksid iti daytoy, adda pay dagiti booth a maestablisar a pagianan ti PhilHealth, Social Security System, Philippine Statistics Authority ken dadduma pay.
Innayonna a daytoy nga aktibidad ken programa ket pagbibinnuligan dagiti nagduduma nga ahensia babaen ti tulong ti gobierno probinsial pakairamanan ti Department of the Interior and Local Government tapno maimpormaranda dagitoy a sektor kadagiti amin nga addang ti gobierno pakairamanan dagiti desision maipanggep kadagiti nagduduma a proyekto ken programa.
