LAOAG CITY – Inlawlawag ni Atty. Gerald Gallardo, Provincial Director iti Department of Interior and Local Government a no ti maysa nga indibidual ket appointed official iti gobierno ken mangipila iti kandidaturana, masapul nga agikkat iti agdama a puestona iti gobierno.
Mainaig iti daytoy, adda dagiti nagduduma a klase dagiti opisial ti gobierno kas iti elective official ken appointed official no sadinno no agkandidato ti maysa nga elective official iti sabali a posision ket saan a nasken agikkat iti agdama a posisionna.
Nupay kasta, kadagiti appointed official a nangipila iti Certificate of Candidacy (COC), maibilangda nga ipso facto resigned wenno automatiko a maikkat iti puestona uray no awan ti naipila a resignation sakbay a nangipila ti COC.
Mainaig iti daytoy, no ti maysa nga indibual ket maysa nga ABC Federated President ti nangipila iti Certificate of Candidacy-na iti kina-Bise Mayor iti maysa nga ili ket maipalubos daytoy gapu ta adda dagiti linteg a mangsupsuportar iti daytoy kas iti RA 9006 Fair Election Act.
Kabayatanna, kinunana nga agtultuloy ti panangrebisar ti nasao nga ahensia kadagiti listaan dagiti kandidato iti probinsia tapno maammuan no adda dagiti appointed officials a nangipila iti kandidatura ken kasapulan nga agikkat.
Nakiuman met ti opisina ti DILG Ilocos Norte iti Comelec tapno masigurado a naballigi, natalna, ken naurnos ti eleksion 2025.
