LAOAG CITY – Nagyaman ni Police Colonel Frederick Obar, ti Provincial Director iti Ilocos Norte Police Provincial Office kadagiti amin a force multiplier a timmulong a nangipaay para iti seguridad para kadagiti nakipaset iti Region 1 Athletic Association Meet.
Inbatadna a nagbalin a natalged dagiti amin nga atleta, coaches, technical officials ken dadduma pay kabayatan ti kaaddada kadagiti temporario a nagtarusanda agingga a mapand kadagiti playing venues dagitoy.
Kunana a naiget ti panagbantayda kadagiti amin a nakaisayangkatan dagiti nagduduma nga ay-ayam tapno maipasigurado nga awan ti dakes a mapasamak.
Inlawlawagna nga ita nga aldaw ket isu ti panagawiden dagiti atleta manipod kadagiti nagduduma nga Schools Division Office iti intero a rehion uno.
Kabayatanna, inpakaammona nga adda laeng ti sumagmamano a road crash incident a napasamak kabayatan ti pannakaisayangkat ti nasao a naindaklan nga aktibidad.
Nupay kasta, kunana a minor injuries laeng ti sinagaba a sugat dagiti maseknan a nakalugan ket nasolbar met laeng dagitoy.
