LAOAG CITY – Inlawlawag ni Atty. Joel Gines, Provincial Election Supervisor ti Commission on Elections ditoy probinsia a saan pay a pormal a nangrugi ti panagkampania dagiti kandidato iti baet ti panangrugin ti election period.
Segun kenkuana, dagiti nagpaidasig a kandidato kadagiti nagduduma a posision ket saan pay laeng nga opisial a maawaganda kas maysa a kandidato.
Inbatadna a daytoy ket maibasar iti Korte Suprema no sadinno nga opisial a maawaganda laeng kas maysa a kandidato apaman a mangrugi ti campaign period.
Kunana a mangrugi ti campaign period iti National para kadagiti Senador ken Party List ken inton Pebrero 11 idinto a ti campaign period met iti Local para kadagiti nagpaidasig kas Congressman, Gobernador, Bise Gobernador, Vocal, Mayor, Bise Mayor ken dagiti Konsehal para iti ili wenno siudad inton Marso 28.
Innayonna nga apaman a mangrugi ti campaign period dagiti maseknan a kandidato ket isu metten ti pannakaipakat dagiti pagannurotan a maipawil kabayatan ti panagkampaniada.
