LAOAG CITY – Saan a pabor ni Atty. Alipio Castillo III, provincial Election Supervisor ti Commission on Elections ditoy Ilocos Norte mainaig ti inpila a gakat ni Sen. Leila De Lima a Senate Bill No. 778 wenno ti pannakaisina ti opisina ti Comelec manipod kadagiti opisina da iti lokal a gobierno.
Kalikagum ti nasao a gakat a mangipatakder ti bukod nga opisina ti Comelec tapno maliklikan ti impluwensya ti pulitika iti uneg ti lokal a gobierno.
Inbatad ni Castillo a saan a kasapulan a mangipatakder ti bukod nga opisina ti Comelec nangruna ket adda pay laeng ti espasyo da kadagiti opisina ti lokal a gobierno.
Inlawlawag na a saan a praktikal daytoy a gakat gapu ta kasapulan manen a mangilatang ti gobierno ti pondo para iti pannakaipatakder kadagiti opisina iti kada munisipalidad nupay ado dagiti napateg a pangusaran ti limitado a pondo ti gobierno.
Kunana a makatrabaho da latta uray siasino ti nakatugaw a mayor wenno gobernador.
