LAOAG CITY – Umannugot ni Atty. Alipio Castillo III, ti Provincial Election Supervisor ti gagem ni Atty. George Erwin Garcia, ti Chairman ti Commission on Elections ti saanen a panangipalubos ti substitution dagiti agipila ti kandidaturana inton May 2025 Midterm Elections.
Segun kenkuana, napintas daytoy nga addang ti Commission on Elections nangruna ket adda dagiti sumagmamano a kandidato nga agipila iti maudi nga aldaw iti Certificate of Candidacy idinto dagiti dadduma ket ag-substitute iti immuna a nagipasa ti kandidaturana.
Inbatadna a ti kinapudnona ket nabayagen nga ikidkiddawda daytoy a banag gapu ta dakkel ti epektoda kadakuada daytoy iti panangbalbaliw dagiti listaan ken dokumento a masapol nga ipasada iti higher office.
Kunana a padagsen kadakuada ti epekto iti panag-substitute iti maysa a kandidato banag a kasapulan koma a sakbay nga agipila ti maysa a kandidato iti kandidaturana ket nasken a buo ti desisionna nga agserbi iti publiko.
Inlawlawagna a saanda metten nga ikagkagumaan a maammoan dagiti rason ti maseknan a kandidato ngem para kenkuana ket negatibo para kadakuada dagitoy kastoy nga aramid dagiti kandidato.
Inpalgakna a maad-adal ti pannakaipawil ti withdrawal ti maysa a kandidato ken mabalin laeng nga ag-substitute no natay wenno nadiskualipikar ti maseknan a kandidato.
Innayonna a manamnama a mangrugi inton umuna a lawas ti Oktubre ita a tawen iti panangrugi ti panagipila ti kandidatura.
