LAOAG CITY – Inlawlawag ni Engr. Luciano Domingo, mangidadaulo ti Provincial Engineering Office a saan a malaylayos ti umiso a panangdiskribir iti mapaspasamak iti basement iti Capitol Extension no adda ti mapaspasaran a napigsa a tudo.
Daytoy ti nagbalin a sungbatna kalpasan nga inbatad ti Provincial Disaster Risk Reduction and Management Office a malaylayos iti underground parking lot.
Inadmitir ni Domingo nga adda ti sumsumrek a danum ngem daytoy ket salapasap laeng ken kabaelan pay laeng a makontrol babaen iti panangsagad.
Inpettengna a daytoy ket resulta ti saan pay a pannakaileppas iti nasao a proyekto nga adda pay laeng ti saan a nalinongan ken awan pay ti sumagmamano a tawana.
Nupay kasta, inpasigurado ti Provincial Engineer nga apaman a maisayangkat ti Phase 2 ti nasao a proyekto ket awanton iti kastoy a mapasamak.
Innayonna nga iti agdama ket adda ti submersible pump a naka-standby tapno mangkunot ti danum a sumrek ti underground parking lot nangruna no adda ti bagyo a sumangbay ita a panawen ti panagtutudo.
