LAOAG CITY – Inpetteng ni Fire Supt. Floro Obrero, Provincial Fire Marshall ti Bureau of Fire Protection (BFP) ditoy probinsya nga awan ti kinapudno na dagiti alegasyon a maibatbato kenkuana.
Daytoy ket ti akusasyon a maipagarop a panagdawat na ti kwarta kadagiti sumrek a BFP personnels.
Segun kenni Obrero, saan nga agdawdawat ti kwarta gapo ta ti Regional Office ti ag-recruit kadagiti sumrek a personnel ti BFP.
Malaksid iti daytoy, maysa pay nga alegasyon ket ti panagdawat na ti paggasolina kadagiti nagduduma a fire station ditoy probinsya ngem naiget a naglikudan na daytoy.
Saan met nga ammo ni Obrero no apay nga adda dagiti kastoy nga alegasyon kontra kenkuana iti laksid a ti pagsayaatan laeng ti ar-aramiden na.
Mamati ni Obrero a ti alegasyon kenkuana ket adda ti pakainaigan na iti insidente iti BFP-Laoag no sadinno a maipagarop a naaktuan nga agin-inom dagiti dua a BFP personnels.
Mainaig iti daytoy, kuna ni Obrero a naipasa dan iti Regional Headquarters ti maipagarop a panaginom da SFO1 Victor Apostol Caise ken SFO1 Charlie Balanay Simisim.
Inlawlawag a ti Regional ti mangimbestigar ti nasao a pasamak gapo ta mairamraman ditoy ti opisyal ti BFP ditoy ciudad.
Naamoan a da Caise ken Simisim ket restricted iti Provincial Headquarters ti BFP ken maimbestigaran ti pasamak.
Innayon pay ni Obrero nga awan ti kinapudno na ti alegasyon a protprotehiran na da Caise ken Simisim, ken kunana a naiget a masursurot ti proseso seknan iti daytoy a banag.
Paset ti panagsarita ni Fire Supt. Floro Obrero, Provincial Fire Marshall ti Bureau of Fire Protection (BFP) ditoy probinsya
