LAOAG CITY – Agsagsaganan ti gobierno probinsial babaen iti Ilocos Norte Sports Development Office para iti maisayangkat a kaunaan nga Ilocos Norte Universities and Colleges Athletic League.
Inpakaammo ni Mr. Faivo Bartolome, Sports Development Consultant ti gobierno probinsial, puntiria a mairugi ti nasao a pay-ayam iti masungad a bulan ti Nobiembre.
Inlawlawagna nga inawisda a makipartisipar ti Mariano Marcos State Univerity (MMSU), Northwestern University (NU), Divine Word College of Laoag wenno DWCL, Data Center College of the Philippines (DCCP), Northern Christian College (NCC) ken padasenda pay a suratan ti STI College.
Kunana a ti Mariano Marcos State Univerity ket maaddaan ti dua a team ti Mariano Marcos State Univerity Batac ken ti Mariano Marcos State Univerity Laoag.
Mangnamnama a makaawis ti probinsia iti uray innem laeng a pagadalan a makipaset iti nasao nga sports competition.
Segun kenkuana, dua laeng a ball games ti maipaay-ayam iti daytoy umuna a pannakaisayangkat ti nasao nga aktibidad, ti basketball ken volleyball.
Innayonna a plano a manaynayunan iti tinawen dagiti maipaay-ayam iti nadakamat nga aktibidad.
