LAOAG CITY – Pimmasa iti Seal of Good Local Governance (SGLG) ita a tawen 2023 ti Provincial Government of Ilocos Norte (PGIN).
Segun ken ni Engr. Pedro Agcaoili Jr., Provincial Planning and Development Officer, daytoy ti maikatlo a daras nga “awardee” ti Provincial Government of Ilocos Norte iti Seal of Good Local Governance a tinawen nga isaysayangkat ti Department of the Interior and Local Government (DILG) malaksid laeng idi panawen ti pandemia.
Imbatadna a daytoy ti kaunaan a pumasa ti Provincial Government of Ilocos Norte iti Seal of Good Local Governance kalpasan ti pito a tawen agsipud ta ti kaunaan ket idi tawen 2015 ken naudi idi tawen 2016.
Pinasingkedanna a narigat a maipatungpal dagiti “requirements” gapu ta sangapulo amin nga “areas” wenno benneg dagiti imonmonitor dagiti maseknan.
Impalgakna a karaman ditoy ti finance, resiliency wenno disaster preparedness, social protection, salun-at, edukasyon, business friendliness, peace and order and public safety, aglawlaw, turiamo ken kultura ken dagiti agtutubo.
Inbunannag ni Agcaoili nga idi napalabas a tawen ket adda laeng ti nagkuranganna a sangkabassit iti benneg ti salun-at.
Nupay kasta, kunana nga iti tulong ni Gov. Matthew Marcos Manotoc ket nagpursigi ti Provincial Health Office tapno pumasa ti probinsia.
Mainaig iti daytoy, kunana a naipatungpal amin ti Provincial Government of Ilocos Norte dagiti sangapulo a benneg iti naisayangkat nga evaluation.
Segun kenkuana, nagun-ud ti probinsia ti nasao a pammadayaw babaen iti panangidaulo ni Gob. Marcos Manotoc ken iti tulong ni Bise Gob. Cecilia Araneta Marcos agingga iti kababaan nga empleado ti Provincial Government of Ilocos Norte . Kabayatanna, innayonna a manamnama ti panangipaay ti Department of the Interior and Local Government iti nasao a pammadayaw iti masungad a Disiembre 13, nupay saanda pay nga inrakurak no sadino idiay Metro Manila ti pakaiyawatan ti nasao a pammadayaw.
