LAOAG CITY – Inpasigurado ni Dr. Josephine Ruedas, Provincial Health Officer nga awan ti kinapudnona nga adda dua nga ubbing a naapektaran ti corona virus ditoy Ilocos Norte kas ti agwarwaras a video ti maysa a Health Practitioner iti Social Media.
Segun kenkuana, babaen ti Social Media ket alisto a nagwaras daytoy a ballaag iti publiko rason a dagus met a naipadanon daytoy a banag ken ni Gob. Matthew Marcos Manotoc.
Inbatad ni Dr. Ruedas a maladingitan ti Gobernador idi naammoanna daytoy a damag ngem masapol a saan nga ag-panic ti publiko.
Inpakaammona a tapno mapaneknekan a corona virus free ditoy Ilocos Norte ket mismo a ti Department of Health ti nangkunpirmaran iti daytoy.
Gapu iti daytoy, nagpalagip ni Dr. Ruedas iti publiko nga ugalienda ti husto a panagugas ti ima ken liklikan a makasagrap ti uyek ti sabali kangrunaanna iti pampubliko a lugar.
Inbagana a mangrugi inton sumaruno a lawas ket adda agoperar a Thermal Scan Machine iti Laoag International Airport para kadagiti sumangpet a pasahero.
Innayon ti Provincial Health Officer a kinuna ti Gobernador a nasken nga agbalin a responsable iti panangiwaras ti impormasion ken siguradoen nga umuna a pudno ti ipadamag sakbay daytoy nga i-share iti social media.
Maipalagip a dagus a dimmawat ti dispensar ni Philippine Nurses Association President – Ilocos Norte Chapter Mr. Jurgen Rushell Rapacon kalpasan a nagwaras ti video na iti Social Media.
