LAOAG CITY – Manarimaan ti imbestigasion ti Provincial Health Office mainaig iti reklamo ti maysa a pamilia iti ili ti Nueva Era kalpasan a natay ti inada gapu iti maipagarup a pannakabaybay-a ken kinabayag a pannakaiyakarna iti ambulansia.
Segun ken ni Dr. Rickson Balalio, mangidadaulo ti nasao nga opisina, adda dagiti inisyal nga impormasion a dimmanon kenkuana a simmangpet ti maseknan a pasiente manipud iti ballasiw-taaw a masakit ngem sipod idi nakasubli ditoy pagilian ket saan pay a napan nagpa-check up ken inur-urayna iti aldaw ti Lunes.
Inlawlawagna a gapu ta parbangon a naitaray ti pasiente ket awan ti doktor ken saan a naipan ti pasiente iti mismo a Rural Health Unit no di ket napan laeng nagayab ti miembro ti pamilia ti pasiente ti ambulansia.
Kunana a maibasar iti Civil Service Commission, Lunes agingga iti Biernes iti oras ti alas otso ti bigat agingga alas singko ti malem ti trabaho dagiti agpapaay iti Rural Health Unit.
Nupay kasta, inpetteng ni Dr. Balalio nga idi isuna pay laeng ti agserserbi kas Municipal Health Officer iti ili ti Nueva Era ket masursurot ti 24 nga oras a nakalukat ti Rural Health Unit ngem sipod idi timmalaw daytoyen ket saanen a maipatpatungpal.
Immuna iti daytoy, inpeksa ti anak ti pasiente ti sakit ti nakemna gapu iti napasamak iti inana.
Segun kenkuana, saan a makaanges ti inana rason nga insigida a napan ti lolana iti Rural Health Unit tapno agpatulong ngem maipagarup a ti inbaga dagiti naka-duty iti Rural Health Unit ket iyurayda laeng ti sungbat ti Mariano Marcos Memorial Hospital and Medical Center iti siudad ti Batac.
Innayonna a nabayag ti nagbalin a tignay ti Rural Health Unit iti baet a namin-adu a daras a nagsubli-sublida tapno ipakaaammo ti kasapulanda.
