LAOAG CTY – Inrakurak ni Dr. Rickson Balalio, officer-in-charge ti Provincial Health Office nga adda ti 31 a nagpositibo ditoy probinsiya sipud idi bulan ti Enero agingga iti Hulyo ita a tawen iti sakit a Human Immunodeficiency Virus wenno HIV.
Daytoy ti inpalgak na kageddan iti panangirakurak ti Department of Health nga agtultuloy ti panagngato ti Human Immunodeficiency Virus cases ditoy pagilyan.
Segun kenni Balalio, basar iti datos iti Provincial Health Office, kaaduan kadagiti nagpositibo ket lallaki nga agtawen ti 25 agingga iti 34.
Innayon na pay a dagitoy ket manipod iti ili ti Bacarra, Badoc, Bangui, San Nicolas, Marcos, Nueva Era, Pagudpud, Paoay, Pasuquin ken iti ciudad ti Laoag ken Batac.
Patien met ni Balalio a dakkel ti posibilidad nga ada manen dagiti baro a nagpositibo iti nasao a sakit ditoy probinsiya.
Mainaig iti daytoy, inbatad na nga adda dagiti sansanayen da nga indibidual a mangiyuswat iti Human Immunodeficiency Virus screening tapno al-alisto ti panakabigbig dagiti pasyente kasta met a paigtengen da ti panagiwaras ti awareness iti publiko mainaig iti daytoy a sakit. Kabayatanna, inpetteng ti Provincial Health Officer a manipod iti 1984 agingga iti daytoy a tawen addan iti kabuklan a 316 nga indibidwal ti nairecord a positibo ti Human Immunodeficiency Virus ken ti kaubingan ket agtawen ti 15.
