LAOAG CITY – Nagpanawagan ni Dr. Josephine Ruedas, ti Provincial Health Officer ditoy probinsya kadagiti nagbalin a pasahero ti Maria De Leon nga addaan ti body No. 29 idi Marso 14 a mapanda agpakonsulta iti Rural Health Unit (RHU).
Inbatad na a daytoy ket tapno masigurado a natalged ti salun-at da ken makita no adda kadakuada dagiti sintomas ti Corona Virus Disease wenno COVID-19.
Inpakaammo na a na-trace dan ti lugar dagiti sangapulo a pasahero a naglugan iti nasao a bus ken dagitoy ket adda ti taga Sarrat ken pito a taga San Nicolas.
Innayon na nga iti agdama ket manarimaan ti panangsapol da ti balay dagiti nagbalin a pasahero ti nasao a bus.
Segun ken ni Ruedas, mismo a ti Provincial Health Officer idiay Ilocos Sur ti nangitawag kenkuana daytoy a banag isut gapuna a dagus na met a kinontak dagiti Municipal wenno City Health Officers ditoy probinsia tapno maipakaammo na daytoy.
Kuna pay ni Ruedas a dagus da a nag-disinfectant iti amin a suli ti nasao a Bus Terminal.
Maipalagip a ti Driver ti nasao a bus ket maibilang nga highly probable case iti COVID-19 idiay Magsingal, Ilocos Sur.
Inlawlawagna nga uray awan pay ti resulta ti test a nagdalanan ti nasao a bus driver manipod iti Research Institute of Tropical Medicine wenno RITM ket agserbi koma daytoy a ballaag kadagiti residente ditoy probinsya tapno saanda nga agruruar iti uneg ti pagtaengan gapu ta nakaam-ammak daytoy a virus no makastrek ditoy probinsia.
