LAOAG CITY – Inpakaammo ni Dr. Rickson Balalio, mangidadaulo ti Provincial Heath Office a maalarma ti nasao nga opisina ti panagngato ti kaso ti human immunodeficiency virus wenno HIV ditoy probinsia.
Segun kenkuana, lallaki dagiti nainayon a nagpositibo iti nadakamat a sakit iti kaudian a datos ti nasao nga opisina idi tawen 2023.
Inabatadna a naalarma ti biang ti Department of Health gapu ta umabot ti 55 dagiti mairekrekord ti ahensia iti kada aldaw nga agposotibo iti nasao a sakit ditoy pagilian.
Innayonna nga umabot ti 68 ti nagpositibo iti sakit nga HIV ditoy probinsia idi tawen 2023 no sadinno 58 kadagitoy ket naala da gapo iti pannakinaig iti pada da a lallaki.
Mainaig iti daytoy, 12 kadagitoy ket manipud ditoy ciudad ti Laoag, 8 manipod iti ili ti Bacarra, 8 iti ili ti San Nicolas, 6 iti ciudad ti Batac ken 7 manipud iti ili Pasuquin.
Innayonna a manipod idi 1984 agingga iti kaudian a datos ket umaboten ti 353 dagiti nagpositibo iti nadakamat a sakit no sadinno 23 ti pimmusayen ditoy probinsia.
Agtul-tuloy nga araramiden ti ndakamat nga opisina ti makibinnulig iti Mariano Marcos Memorial Hospital para iti Info Education Campaign tapno maballaagan ti publiko no kasano a maala, malapdan ken maitrato a normal dagiti tao a positibo iti human immunodeficiency virus.
Kabayatanna, namnammaen ni Dr. Balalio a maipaima kadakuada ti baro a datos mainaig iti nasao nga sakit iti umuna a semestre iti daytoy a tawen inton umay a bulan ti Hulio ngem nu pay kasta patien ti Provincial Health Office nga adda dagiti baro a kaso.
