LAOAG CITY – Mabuangay ti Provincial Monitoring Council babaen ti maysa nga ordinansa nga inpasa ti Sang Panlalawigan tapno mangmonitor kadagiti Infrastructure Projects ditoy probinsya.
Ti nasao a grupo ket buklen ti Chairman ti Committee on Infrastructure, Laws, Good Governance, Vice Governor ken Governor.
Segun kenni Bokal Saul Lazo, babaen ti nasao a grupo ket maala amin a rekord manipod kadagiti nagduduma nga ahensya kas koma ti Department of Public Works and Highways, National Irrigation Administration, Department of Transportation ken dadduma pay nga ahensya a mangiyim-implementar kadagiti nasao a proyekto.
Kuna na a ti pay agbalin a trabaho ti grupo ket adalen ken alaen da amin ti detalye dagiti proyekto, ken ipakaammo iti publiko.
Mainaig iti daytoy, inpakaammo ni Lazo nga ita a lawas ket mangiparuk-at ti Sang panlalawigan ti impormasyon mainaig kadagiti naiyimplementar a proyekto ditoy probinsia.
Innayon na a babaen ti Provincial Monitoring Council ket mamonitor to aminen dagiti maiyimplementar a proyekto agingga iti pannakaiyawat dagitoy kadagiti Local Government Units.
Immuna iti daytoy, inpakaammo ni Vice Governor Matthew Marcos-Manotoc a nagkiddaw ti listaan dagiti flood control projects ditoy probinsia manipod iti Department of Public Works and Highways, ngem nagdesisyon ti Sang Panlalawigan a nangputar ti ordinansa a sangsangkamaysa da a mangkiddaw ti listaan ken mangkita ti implementasyon dagitoy a proyekto.
