LAOAG CITY – Napaltugan ti maysa a provincial security guard kabayatan a nakaduty iti Provincial Engineering Office iti Barangay 7-B ditoy ciudad ti Laoag agarop alas-siete idi rabii.
Nabigbig ti biktima a ni Roderick Ramos Manuel, agtawen ti 49, naasawaan ken residente iti Barangay 53-Rioeng ditoy ciudad.
Kadwa ti biktima a nakaduty ni Provincial Security Guard Theodoro Agbayani Herbacio, agtawen ti 54, awanan ti asawa ken residente iti Barangay 3, San Pedro iti ili ti Vintar.
Segun ti report, kalpasan a nangrabii dagiti dua a security guard ket napan ni Manuel iti lababo ti guardhouse, kabayatan ti kaadda na iti lababo ket adda ti nangpaltog kenkuana a nakadamgisan ti ulo na.
Gapu iti nasao a putok ket nagpaputok met ti kaddua na a guardiya a ni Herbacio.
Insigida nga intaray ni Herbacio ni Manuel iti Governor Roque Ablan Senior Memorial Hospital ditoy ciudad ti Laoag para ti pannakaagas na.
Iti panagimbestigar dagiti kameng ti SOCO ket nakarekobre da iti maysa nga empty shell ti cal. 9mm.
Innala pay dagiti kameng ti SOCO dagiti service firearm da Manuel ken Herbacio tapno maipadalan iti ballistic examination kas paset paylang ti imbestigasyon.
Mainaig iti daytoy, naamoan a maymaysa ti pagserkan ken pagruwaran dagiti behikulo mapmapan iti nasao a lugar.
Agtultuloy ti imbestigasyon dagiti otoridad tapno maamoan no siasinno ti responsable iti pannakapaltog ni Manuel.
