LAOAG CITY – Kalikagum a makikoordinar ti Provincial Sports and Development Office iti Bureau of Fire Protection ken Prime Water seknan iti posible a panagkurang ti danom a mausar inton 2025 Palarong Pambansa.
Segun ken ni Mrs. Helen Rose Domingo, mangidadaulo ti Provincial Sports and Development Office, iti agdama ket manarimaan ti panagbirbirokda iti deep well wenno dagiti bubon a mabalin a pangalaan ti danom.
Inbatadna a babaen iti daytoy a wagas ket maipasigurado nga adda ti umdas a suplay ti danom para kadagiti atleta ken dagiti bisita nangruna kadagiti billeting area.
Inlawlawagna a saanen a baro daytoy a problema gapu ta idi nag-host ti Ilocos Norte iti Region 1 Athletic Association Meet iti napalabas a tawen ket maysa daytoy kadagiti kangrunaan a parikotda.
