LAOAG CITY – Nangiparuk-aten ti Provincial Tourism Office ti listaan dagiti nagduduma nga aktibidad para iti mapaspasangasangan a Todos Los Santos wenno fiesta dagiti minatay.
Basar iti Provincial Tourism Office daytoy ket maaw-awagan iti Semana ti Ar-aria 2024 Ilocano Haloween Festival.
Naammoan nga inton Oktubre 25 ket ditoy a mangrugi ti pannakaiyuswat ti Ayala Museum Doll Collection Exhibition iti Arte Luna, Paoay iti oras ti alas dies ti bigat.
Malaksid iti daytoy, maisayangkat inton Oktubre 30 ti Ar-aria Film Drive-in iti Marcos Stadium ditoy siudad ti Laoag, Oktubre 31 ti Trick or Treat ken Parada Iloca-locana iti Kapitolio Probinsial iti oras ti alas kuatro ti malem ken ala sais ti sardam ken maiyuswat inton Nobiembre 1 agingga 2 ti Tumba iti ili ti Paoay iti oras ti ala sais ti sardam.
Kabayatanna, ti pannakaiyuswat dagiti nasao nga aktibidad ket paset ti Semana Ar-aria a programa ti gobierno probinsial tunggal madanon ti pannakalagip dagiti natay.
