LAOAG CITY – Inpakaammo ni Mr. Aianree Raquel, Provincial Tourism Officer dagiti nagduduma nga aktibidad a maipatungpal kabayatan ti pannakaselebrar ti maika-206 a Founding Anniversary ti Ilocos Norte inton Pebrero 2.
Segun kenkuana, maysa kadagiti agbalin nga highlights iti naindaklan a selebrasion ti probinsia ket ti pannakaiyuswat ti Tan-ok Festival of Festivals.
Inbatadna ita a tawen ket adda dagiti sumagmamano a panagbalbaliw dagiti pagannurutan a maiyimplimentar iti pannakaisayangkat ti nasao nga aktibidad.
Inlawlawagna nga adda ti baro a judging criteria no sadino iti story, performance, choreography, production design ken originality dagiti performers iti tunggal ili ken siudad ket agpapada a 20 a porsiento.
Kunana a daytoy nga aktibidad ket pagbibinnalubalan dagiti dagiti 21 nga ili ken dua a siudad ditoy probinsia.
Mainaig iti daytoy, maipalubos pay ti live music ke dadduma pay a piyesa tapno napinpintas ti agbalin a resulta ti performance ti tunggal maysa kadakuada.
Malaksid iti daytoy, gutgutiguten ti Provincial Tourism Officer a makipaset iti maikapat a tawen ti Tan-ok ni Ilocano Film Festival a Documentary Film Festival.
Kunana a dagiti dati nga immunan a nakipartisipar iti daytoy ket nakadanon iti benneg ti international competitions.
Inbatadna a ti final screening iti daytoy ket iti umuna a lawas ti bulan ti Marso.
Manamnama pay ti pannakaipatungpal ti baro a pasalip nga Ilocano Pop Music babaen ti bukud a pagsasao nga Ilocano.
Naammoan a maiyuswat ti Tan-ok Festival of Festivals inton Pebrero 16 iti Ferdinand Edralin Marcos Stadium ditoy siudad ti Laoag.
Kabayatanna, inpasigurado ni Raquel ti kinatalged dagiti amin a performers a makipaset iti naisangsangayan nga aktibad ti probinsia.
