LAOAG CITY – Inpasigurado ni Mr. Aianree Raquel, provincial tourism officer ditoy probinsya a natalged dagiti wirings dagiti christmas lights a naidekorar iti sango ti kapitolyo probinsyal a manamnama iti pannakapasilaw na intono agsipnget.
Inbatad na a nakalupkupan a naimbag dagiti wirings babaen kadagiti electrical engineers tapno saan a narisgu para kadagiti tattao nga umasideg iti christmas tree ken dagiti dadduma pay a dekorasyon.
Kuna ni Raquel nga adda ti gundaway a mabasa dagiti waya babaen kadagiti angep nangruna no rabii isut gapuna a daytoy ti kangrunaan a kinita dagiti inhinyero ken pannakabagi ti General Services Office, ken inspeksiyonen ti Bureau of Fire Protection.
Innayon na a masapul nga adda latta ti nakabantay iti sango ti kapitolyo probinsyal tapno ad-adda a natalged dagiti tattao nga agpasyar.
Maipalagip nga adda ti pimmusay nga ubing kalpasan a nakuryente iti christmas tree ditoy siudad ti Laoag iti kallabes.
