LAOAG CITY – Immapela ti tulong kangrunaan na dagiti agas ken bitamina para kadagiti ayop ni Doctor Romelito Marasigan, Provincial Veterinarian iti probinsya ti Batangas.
Iti eksklusibo nga interview ti Bombo Radyo Laoag ken ni Marasigan, inbatad na a gapu ti kaado dagiti dingwen a masapol a maisalakan iti panagalburuto ti Bulkan Taal ket ado nga agas ken bitamina ti kasapulan da.
Inbatad na nga adon dagiti nagited ngem possible nga agkurang pay laeng gapu ti kaado dagiti dingwen iti nasao a probinsya a masapol a maipaayan ti bitamina.
Innayon ni Marasigan a basar iti monitoring da ket awan pay dagiti naireport kadakuada a natay a dingwen gapu iti ash fall manipod iti Bulkan Taal.
Kabayatanna, inbatad ni Mr. Erich Rodillo, Administrative Assistant ng City Government of Sto. Tomas, Batangas nga iti agdama ket umaboten ti agarop 3 ribo a pamilya wenno kaibatugan ti agarop 9 a ribo nga indibidual ti adda kadagiti evacuation centers idiay Batangas.
