LAOAG CITY – Kinumpirmaran ni Dr. Loida Valenzuela, ti Provincial Veterinarian nga addan ti kaso ti African Swine Fever (ASF) ditoy Ilocos Norte partikular iti Barangay Maananteng iti ili ti Solsona.
Daytoy ket kalpasan a rimuar a lima a resulta dagiti naalaan ti sample a baboy.
Segun kenni Valenzuela, sibibiag a nalaan dagiti baboy ti sample ngem dagitoy ket nai-dispose para iti pannakaprebentar ti kaso ti sakit ti baboy.
Naamoan nga adda pay dagiti sumagmamano nga addaan ti taraken a baboy nga agresistir wenno saan a mangipaay ti husto nga impormasyon kas iti naggapoan dagiti taraken da.
Nupay kasta, kuna ni Valenzuela nga umaboten iti 101 dagiti baboy ti napapatay babaen iti pannakakuryente ken naikali dagitoy.
Inpetteng na a ti laeng Solsona ti naka-red zone partikular ti Barangay Manalpac ken Maananteng.
Mainaig iti daytoy, inpasigurado ni Valenzuela a mayat latta a rumuar dagiti baboy nga aggapo iti sabali a barangay iti ili ti Solsona ngem agdepende iti maysa a munisipyo no agpastrek da ti baboy nga aggapo iti nasao nga ili.Agtultuloy met ti panagsursur da kadagiti Sitio nga apektado iti barangay seknan iti daytoy.
