LAOAG CITY – Nagkiddaw ni Provincial Veterinarian Dr. Loida Valenzuela ken ni Gov. Matthew Marcos Manotoc nga agbalin a libre ita a bulan ti Marso dagiti mapan agpabakuna kadagiti tarakenda nga aso ken pusa iti pangopisinaanda.
Segun kenkuana, planoda ti mapan makisarita kadagiti Mayor manipod kadagiti nagduduma nga ili ken siudad ditoy probinsia tapno mangilatangda ti pundo iti maseknanda a lokal a gobierno para iti rabies vaccine a nayon nga usaren dagiti umili.
Inbatadna a nabayagen ti pannakikoordinarda kadagiti lokal a gobierno tapno mangisayangkat ti augmentation a mangkita iti nasao a banag.
Inlawlawagna a babaen iti daytoy nga addang ket bassit laengen ti masapol a magastos gapu iti panagtitinnulong ti nagbaetan ti barangay, munisipio pakairamanan ti opisinada.
Maipalagip nga addan ti nairekord iti Provincial Veterinary Office a 19 nga aso a nagpositibo iti rabies ita a tawen.
