LAOAG CITY – Nagpanawagan ni Dr. Loida Valenzuela, Provincial Veterinarian iti publiko a saan pay laeng nga agiserrek ti taraken a manok ken itlog manipud kadagiti lugar nga addaan ti kaso ti Avian flu.
Segun kenni Valenzuela, daytoy ket tapno maliklikan ti posible a pannakaapektar ti probinsya nga Ilocos Norte iti nasao a sakit.
Inlawlawag na a kalpasan a nakastrek ti avian flu iti Cauayan City, Isabela ket adda metten ti advisory da kadafiti lokal a gobierno ken quarantine checkpoint.
Kunana nga adda pay ti pannakikoordenar da kadagiti veterinary officers iti Region 1 kangrunaan na iti Region 2 para iti panagtitinnulong a saan nga agwaras ti nasao a sakit dagiti manok.
Mainaig iti daytoy, kunana a naiget ti panagmonitor dagiti maseknan nga ahensya tapno maliklikan ti posible nga iserserrek ti nasao a sakit ditoy probinsya.
Inpetteng na a no adda ti matamaan kadagiti poultry farm ket dakkel ti epekto na nangruna ket ado ti matmatay ken ti epekto na iti salun-at iti tao.
