LAOAG CITY – Pinunas ti Provincial Veterinarian a ni Dr. Loida Valenzuela ti panagdanag ti publiko mainaig kadagiti baboy a nagpositibo iti African Swine Fever (ASF) virus iti Brgy. 16 iti ili ti San Nicolas.
Inaramid na daytoy kalpasan ti panagresponde da apaman a nakaawat da ti report seknan iti nasao a kaso manipod iti maysa kadagiti backyard raisers iti nadakamat a lugar.
Inpakaammo na a nangiwayat da nga insigida ti surveillance activity apaman a naawat da ti resulta babaen iti Dept of agriculture regional laboratory babaen iti RTPCR test manipod kadagiti samples dagiti baboy isut gapuna a nagballigi da a nangkontrol ti virus iti uneg ti 14 nga aldaw nga intuyang ti Department of Agriculture a control period.
Kinumpirmaran ni Valenzuela nga adda ti 35 a baboy a nagpositibo ti African Swine Fever a pakairamanan dagiti natay iti Barangay 16 iti ili ti San Nicolas.
Segun kenkuana, iti pannakaiwayat ti controlled measures ti 500-meter radius ket umabot ti sumurok kumurang a 90 a baboy a taraken ti 19 a backyard raisers ti nakuryente.
Inlawlawag ni Valenzuela a sakbay ti culling process ket kinataripnong da nga immuna dagiti maseknan a backyard raisers tapno ilawlawag a nasayaat kadakuada ti panangkuryente da kadagiti taraken da a baboy a masakupan ti 500-meter radius uray saan da a nagpositibo ti African Swine Fever.
Inkari ni Valenzuela a dagiti naapektaran ti taraken na ket ipaayan da ti tulong-pinansyal manipod iti 4 ribo a pisos agingga iti 12 a ribo a pisos.
Mainaig iti daytoy, inrakurak na a karaman kadagiti ad-adalen da no kasanu a naapektaran ti virus dagiti baboy ket ti pannakalayos ti lugar a mabalin a kontaminado ti African Swine Fever virus ti danom.
Innayon na a mabalin a narabaw ti pannakaikali dagiti immunan a naapektaran ti African Swine Fever virus a baboy wenno adda dagiti naikali a saan a naireport iti opisina da.
Kabayatanna, inpalgak ni Valenzuela a ti maysa nga ar-aramiden da iti agdama ket ti naiget a panagbantay da ti yellow zone a code ti probinsya ti African Swine Fever no makaapektar ti napasamak iti ili ti San Nicolas.
Immapela pay ni Valenzuela iti naan-anay a kooperasyon ken tulong ti umili tapno saanen a manayunan ti bilang dagiti taraken a baboy a maapektaran ti African Swine Fever virus.
Iti agdama, kuna ni Valenzuela a mangiwaywayat metten dagiti dadduma nga ili ti surveillance tapno masigurado a saan a makastrek ti virus iti masakupan da a lugar.
