LAOAG CITY – Kalikagom ti Provincial Veterinary Office a pilaan ti kaso dagiti tao a karaman iti nakumpiskaran da iti “pork skin” iti maysa a terminal ti bus ditoy ciudad ti Laoag a maipagarop nga apektado ti African Swine Fever (ASF).
Segun kenni Provincial Veterinarian Dr. Loida Valenzuela, saan nga umiso ti wagas a pannakaibiyahe ti kudil ti baboy manipud iti importer idiay Manila ken ti consignee ditoy Ilocos Norte.
Daytoy ket kalpasan a naduktalan dagiti otoridad nga awan ti umiso a dokumento ti nasao a produkto ken naikarga laeng daytoy iti karton ti sigarilyo.
Naamoan nga umabot ti 68 a babassit a plastics bags nga agdagsen ti 340 a kilos ti nakaikabilan dagiti nasao a tagilako.
Kabayatanna, pabor ti lokal a gobierno ditoy ciudad ti Laoag a rumbeng laeng a mapatawan ti pannusa dagiti adda iti likudan ti nasao a pasamak.
