LAOAG CITY – Nagpalagip manen iti publiko ni Dr. Loida Valenzuela, ti mangidadaulo iti Provincial Veterinary Office kontra iti African Swine Fever, kalpasan nga adda manen ti sumagmamano a lugar iti maysa a probinsya iti Rehiyon Uno nga apektado ti virus.
Inpetteng ni Valenzuela a tapno maliklikan ti virus ket saan a basta agpastrek kadagiti taraken a baboy manipod kadagiti nagduduma a lugar.
Inpakaammo na a ti laeng maipalubos a maiserrek ditoy probinsya ket dagiti breeders manipod kadagiti farms nga addaan ti Certificate of Free Status on African Swine Fever; accredited breeder farms ken dagiti imported manipod kadagiti pagilian nga awan ti kaso na iti nasao a sakit.
Malaksid kadagitoy, karaman pay a maipalubos a sumrek ditoy probinsya ket dagiti piglet a para kadagiti project sites a pinondoan ti gobierno national.
Mainaig iti daytoy, binalakadan ni Valenzuela dagiti umili a tapno masigurado a natalged ti probinsya manipod iti virus ket masapol a saan nga ilimed kadagiti ti impormasyon maipanggep iti agsakit wenno matmatay a baboy; saan nga agpadakay iti pangganakan a baboy kadagiti maisursursor a bula gapu ta daytoy ket maus-usar iti nagduduma a lugar, saan nga agparti wenno aglako iti masakit a baboy ken dadduma pay.
