LAOAG CITY – Inrakurak ni Mrs. Shirley Pascua, Acting Provincial Director iti Technical Education and Skills Development Authority ditoy Ilocos Norte iti plano ti national agency a mangipatakder iti Provisional Provincial Training Center iti kada probinsya ditoy Pilipinas.
Inbatad na a bayat iti panagsarita da 2nd District Congressman Angelo Marcos Barba kenni TESDA Regional Director Vincent Aljon Cifra mainaig iti nasao a banag ket inkiddaw ti diputado nga iti ili ti Banna ti pakaipatakderan ti nasao a pasdek.
Segun kenni Pascua, sinaludsod ni Mayor Carlito Abadilla iti ili ti Banna no kasano ti kalawa ti kasapulan a pakaipatakderan ti nasao a training center.
Kuna na a nakita da Provincial Director Charito Santos kenni Ms. Abigail Ciano nga agbalin a head ti training center ket mabalin a mausar ti daan a building a masarakan iti sango ti munisipyo ti nasao nga ili.
Mangnamnama ni Pascua nga iti opisina da a makibinnulig ti lokal a gobyerno iti ili ti Banna tapno maiyestablisar ti nasao a training center.
