LAOAG CITY – Maamak dagiti residente kangrunaan kadagiti asideg iti lokasyon ti pakaipatakderan ti cellular tower iti Brgy. Loing iti ili ti Piddig.
Iti nakalap nga impormasyon ti Bombo Radyo Laoag, arig nga alad laeng iti nagbabaetan ti pakaitakderan ti torre ken dagiti pagtaengan ken pagadalan iti nasao a barangay.
Naimatangan ti Bombo Radyo a narugiyanen iti panagkutkut para ti nasao a proyekto.
Mainaig iti daytoy, adda dagiti residente a saan a nagpirma ken adda dagiti nagpirma iti dukomento a nakailanadan iti pannakaipalubos a maipatakder ti nasao a proyekto ken adda da met dagiti saan a pormal a napakaammuan.
Immunan nga inpetteng ti Department of Information and Communication Technology a napigpigsa pay laeng ti radiation ti cellphone ngem iti torre ti nasao a gadget.
Kinumpirmaran ni Barangay Kagawad Joaquin Triunfante iti Brgy. Loing Piddig a nagcourtesy call ti maysa a kompanya iti barangay da idi Nobyembre 16, 2019.
Inbilin na kadagiti maseknan nga umuna nga agturong da iti munisipyo tapno mangala kadagiti kasapulan na.
Nupay kasta, saan a naipakammo daytoy kadagiti residente ken adda ti inpapirma ti kompanya kadagiti bumarangay.
Naamuan ti Bombo Radyo a nagaramid ti barangay ti resulosyon mainaig ti gagem ti kompanya nga agipatakder ti torre nga imbes ket maiyendorsar iti Sangguniang Bayan.
Ibilang ti inhinyera ti lokal a gobyerno iti ili ti Piddig a makaalarma ti napasamak.
Basar iti opisina a masapul ti public hearing ti nasao a proyekto.
Maipalagip a saan a naituloy ti pannakaipatakder ti cell tower iti Brgy Nangalisan ditoy siudad ti Laoag gapu iti panagriri dagiti bumarangay.
