LAOAG CITY – Inbatad ni Engr. Roy Tomas iti City Engineering Office ditoy ciudad ti Laoag nga ado dagiti proyekto da a maapektaran gapu ti saan a pannakaipasa ti pondo ti ciudad ita a tawen.
Karaman ditoyen ti solid waste management ditoy ciudad ti Laoag gapu ta adda iti 2019 budget ti nayun ti pondo a paggatang da ti lote iti Barangay Balatong a pakaaramidan ti sanitary landfill.
Inlawlawag na nga idi koma pay laeng 2018 a napaserraan ti pagbasuraan iti Barangay Lagui-Sail ngem nakisarita da a mausar pay laeng bayat a maar-aramid ti pagbasuraan iti Barangay Balatong.
Nupay kasta, gapu ti saan a pannaka-aprubar ti pondo ditoy ciudad ti Laoag ket a maapektaran ti nasao a proyekto.
Gapu ti daytoy, kuna ni Tomas a ti laengen kasayaatan a maaramid ket mamentenar nga iti holding area ti pakaikabilan dagiti basura iti Barangay Lagui-Sail.
Malaksid ti daytoy, uray ti pannakatarimaan dagiti Multi-purpose function hall idi nagduduma a barangay ken dadduma a naperdi a pasdek gapu ti iduduprak ti bagyo Ompong ket apektado.
