LAOAG CITY – Kinontra ni Barangay Kagawad Jessie Lagundino iti Barangay Pancian iti ili ti Pagudpud ti nagbalin a rakurak ni Engr. Ma. Venus Torio, ti District Engineer iti Department of Public Works and Highways (DPWH) iti umuna a distrito ditoy probinsya.
Daytoy ket mainaig iti napasamak a landslide iti paset ti Barangay Pancian iti ili ti Pagudpud no sadinno a nagaburan ti dakkel a paset ti kalsada a nangitunda ti saan a pannakadalyasat dagiti motorista.
Agpapan ita ket saan pay a naan-anay a nawaknitan iti nadakamat a lugar ken agtultuloy pay laeng ti panagregreg dagiti batbato manipod iti bantay.
Immunan nga inbaga ni Torio a saan a ti manarimaan a matartarimaan a paset ti bantay iti nadakamat a barangay ti nangitunda iti napasamak a landslide.
Nupay kasta, inpetteng ni Barangay Kagawad Lagundino a dagiti nagreggaay ket isu dagiti nabakbakbak manipod iti proyekto ti DPWH.
Innayon na a sipud adda ti poot na ket awan pay ti kastoy ti kagrabe na a landslide iti lugar ngem sipud adda ti proyekto ti DPWH iti lugar ket addan dagiti mapaspasamak a landslide uray awan ti tudo.
