LAOAG CITY – Inlawlawag ni Mrs. Marilyn Vergara, chief statistical specialist iti Philippine Statistics Authority (PSA) ditoy Ilocos Norte a preliminary pay laeng ti maiyus-uswat a panagukkon ti datos para iti National ID System.
Sungbat daytoy ni Vergara iti arungaing dagiti sumagmamano a kaprobinsyaan nga agamak a saan a mairehistro iti barangay a pagnanaedan da no saan a makasarita a mismo dagiti data collectors ti PSA wenno awan da iti pagtaengan da.
Segun kenni Vergara, saan laeng nga iti aldaw a panagsursur dagiti data collectors ti mabalin a panangited ti impormasyon ti maysa nga indibidwal.
Daytoy ket gapo ta addan to pay ti maipan a booth iti mismo a PSA Office ken iti biang ti online.
Inbatad na a no saan man a madanon dagiti data collectors iti panawen a panagsursur da gapo ta addan to latta ti gundaway a mabalin nga agparehistro.
Mainaig iti daytoy, kunana a saan met a maikkan ti National ID dagiti indibidwal nga awan ti biometrics na, eye scan ken ti identifications a pakabigbigan a basis ti PSA.
