LAOAG CITY – Nakasublin iti serbisyo ni Police Staff Sergeant Jonel Mangapit kalpasan a naiserbi na ti 60 nga aldaw a pannakasuspenso na.
Daytoy ti kinumpirmaran ni Police Major Lauro Milan, ti mangidadaulo iti Provincial Administrative and Resource Management Unit ti llocos Norte Police Provincial Office (INPPO).
Nupay kasta, inbatad ni Milan a kagiddan iti panagsubli ni Mangapit iti serbisyo ket isu metten ti panagpila na ti retirement na.
Segun ken ni Milan, agpatingga laengen ni Mangapit iti serbisyo intono Enero 2022 no sadinno nga iti agdama ket naka-Non Duty Status (NDS) ti maseknan.
Maipalagip nga idi 2020 ket nakasoan ni Mangapit iti kaso administratibo a simple neglect of duty ken simple irregularity gapu iti saanna a panangasistir iti maysa nga indibidual a napan nagreklamo kabayatan a nakaduty daytoy kas complaint desk officer iti PNP ditoy ciudad ti Laoag.
Immunan a nagbalin a kontrobersyal ni Mangapit kalpasan a pinilaan na ti maysa a nangato nga opisyal ti PNP ditoy probinsya a ni Police Major Ryan Retotar iti kaso nga attempted rivalry, extortion ken grave misconduct.
Ni Retotar ti mangidadaulo iti Provincial Investigative and Detective Management Unit iti INPPO iti dayta a gundaway.
Iti agdama ket adda pay laeng iti ombudsman dagiti inpila a kaso ni Mangapit kontra ken ni Retotar.
