LAOAG CITY – Nangisayangkat ti Provincial Social Welfare and Development Office ken Land Transportation Office ti Theoretical Driving Course Training and Seminar para kadagiti Person’s With Disability.
Daytoy ti inpakaammo ni Ms. Rochelle Gajes, mangidadaulo ti Provincial Social Welfare and Development Office.
Segun kenkuana, adda dagiti sumagmamano nga indibidual nga adda ti rangkap ti bagida ti nagatendar iti nasao nga aktibidad manipud kadagiti nagduduma a Local Government Units.
Inbatadna a napanunotanda ti nasao a programa kalpasan nga adu kadagiti adda ti rangkap ti bagina ti agkalikagum a makasursuro nga agiturong ti behikulo.
Inlawlawagna nga adda pay ti naimbitaran a resource speaker tapno ad-adda a maisuro kadakuada dagiti nasken nga aramiden dagitoy iti panagiturong ti lugan.
Naammoan a nangrugi a naisayangkat daytoy a programa ita nga aldaw ti Huebes ken agngudo inton bigat, aldaw ti Biernes.
Innayonna nga idi koma pay laeng bulan ti Hulio a naiyuswat ti nasao a programa ngem gapu kadagiti naglabas a bagyo ket isu ti nangitunda iti pannakaitantanna.
