LAOAG CITY – Saan a pabor iti “No Homework Policy” ni Miss Bennalyn Grace Coloma, Parent Teacher Association (PTA) Officer iti Quiling Sur Elementary School iti ciudad ti Batac.
Inlawlawag na a ti balay ket extension iti pagadalan isut gapuna a dagiti saan a naileppas a lesson ket mabalin nga irepaso iti balay.
Inyarig na pay no panawen ti eksaminasyon a kasapulan ti agreview iti balay no sadinno nga ibilang na nga awan ti pagdumaan daytoy iti panagaramid ti homework wenno assignment dagiti estudyante.
Innayon na nga uray iti bakasyon ket nasken latta a rebisaren dagiti estudyante dagiti inadal da iti pagadalan.
Kuna pay ni Coloma a saan a kasapulan a pwersaen ti anak a mangsango kadagiti lesson na no di ket rumbeng met nga ikkan ti panawen nga agay-ayam.
Nupay kasta, kalpasan ti panagay-ayam na ket isunton ti panangibaon a mangaramid kadagiti nasken nga aramiden na para iti lessons na.
Inpalgak na a ti napateg ket ammo nga imanihir ti ubing ti oras na para kadagiti lessons na ken ti panawen na nga agrelaks no bakasyon.
Naamoan a ti anak ni Coloma ket adda pay laeng iti kindergarten.
Maipalagip nga inlungalong ni Senador Ramon Revilla Jr., ti Senate Bill No 1792 wenno ti “No Homework Act of 2023,” ilunglungalong daytoy nga awan ti mandatory nga assignment iti weekend no di ket maaramid laeng iti weekdays.
Naipalaon pay iti gakat a masapol a minimal laeng ken saan a sumurok-kumurang a dua nga oras ti panagaramid ti assignment dagiti estudyante.
Inpetteng ti senador a dagiti take-home assignment ket mangipababa iti produktibidad ken karirikna dagiti estudyante iti edukasyon, nga agtungpal iti ad-ado a dropout rate ken nababbaba a grado.
Inbatad pay ni Revilla a no basbassit ti maited nga assignment kadagiti estudyante ket ad-ado ti maipaay nga oras dagiti nagannak kadagiti annak da.
Inpalagip ni Revilla nga iti panagadal idi 2009 nga inyuswat ti The Organization for Economic Cooperation and Development’s Program for International Student Assessment (OECD PISA) ket naduktalan a ti nayun nga oras para iti assignment ket adda ti bassit nga epekto na iti performance ti maysa nga estudyante.
