LAOAG CITY – Kinumpirmaran ni Mrs. Analyn Domingo, ti Parent Teacher Association (PTA) President iti Barabar Elem School iti ili ti San Nicolas nga adda ti 300 a pisos a bayadan ti kada pupil a para Elementary Day da.
Inlawlawag ni Domingo a ti nasao a kantidad ket napagnunumoan nga immuna ken bayat ti pannakaipresentar na kadagiti nagannak ket awan ti nagreklamo.
Kuna pay ni Domingo a saan laeng nga iti Barabar Elem School ti pakasingsingiran ti 300 a pisos no di ket amin a pagadalan iti elementary iti ili ti San Nicolas ket agbayad iti nasao a kantidad para iti Elementary Day gapu ta isu ti napagnunumoan ken inaprubaran ti ngato.
Innayon na a no saan a kabaelan ti nagannak ti agbayad ket makisarita da koma nga umuna kadakuada ken saan koman nga ipadanun iti radyo.
Inpalgak pay ni Domingo a saan da a piliten dagiti saanna a kabaelan ti agbayad.
Mainaig iti daytoy, inpakaammo ni Domingo a ti maukkon da a kantidad ket usaren da a pagpatarimaan kadagiti wirings iti nasao a pagadalan.
Immuna iti daytoy, adda ti maysa a parent iti nadakamat a pagadalan a nagreklamo iti Bombo Radyo mainaig iti pannakasingisingir da ti 300 a pisos a kontribusyon iti kada pupil.
