LAOAG CITY – Nagpanawagan ti public health advocacy group ken ti agarop 60 a Youth Organizations para iti komprehensibo a pannakaipawil ti vape iti pagilian tapno maprotehiran ti younger generation manipod iti ad-adda pay a panagraira ti “vapedemic.”
Gutgutiguten pay dagiti grupo ti gobierno a tuladen dagiti pagannurutan nga ipatpatungpal dagiti kaparanget a pagilian no sadinno nga inpatungpal da ti naan-anay a pannakaipawil ti electronic cigarettes ken ti novel nicotine products.
Inbatad ni dati nga Health Secretary ken Health Justice board member Dr. Jaime Galvez Tan a saan da a kabaelan a maibilang laeng daytoy kas low-priority issue.
Inpaganetget na a ti maminpinsan a pannakaipawil ti vape ket isu ti pagpatinggaan ti “cycle of misinformation” mainaig kadagiti vapes ken masalwadan ti salun-at dagiti agtutubo.
Innayon na a mangnamnama da a trataren a dagus daytoy ti gobierno tapno maprotehiran ti salun-at ti publiko ken kinatalged dagiti sumarsaruno nga henerasyon.
