LAOAG CITY – Naiyuswat ti public hearing mainaig iti anti-bullying ordinance ditoy ciudad ti Laoag.
Gagem ni Konsehal Bryan Alcid, ti nangisponsor iti anti-bullying ordinance a maipasa ti nasao nga ordinansa tapno maisardengen dagiti mapaspasamak a bullying kadagiti pagadalan.
Inpakaammo ni Alcid a mismo pay a ti anak na ti mabul-bully iti pagadalan no sadinno nga adda dagiti gundaway nga agawid nga agsangsangit.
Mamati ni Alcid a babaen iti nasao nga ordinansa ket malapdan ti pannakaapektar ti mental health dagiti ubbing wenno agad-adal kas komento dagiti mangisursuro a nagatendar iti public hearing.
Innayon na a mabalin a manayunan ti probisyon iti nasao nga ordinansa gapu ta adda dagiti suhestiyon a masapol a maikonsiderar isut gapuna a makitaripnong ti konseho iti Department of Education ditoy ciudad ti Laoag.
Kabayatanna, Konsehal Jaimee Fariñas, ti Chairman iti Committee on Education ditoy ciudad a masapol a maipasa ti nasao nga ordinansa iti kabiitan a panawen tapno masigurado a maisardengen dagiti mapaspasamak a bullying kadagiti pagadalan ditoy ciudad.
