LAOAG CITY – Naisayangkat iti public hearing iti Sangguniang Panlalawigan iti kapitolyo probinsyal itay malem ken napagsasaritaan ti ordinansa a mangimanmandar kadagiti amin a nakamotorsiklo, bisikleta, e-bike, tricycle, kurong-kurong, farm machineries kas iti kuliglig ken traktor nga agsuot iti high visibility vest kabayatan ti panagdalyasat da iti national highway, pakairamana iti probincial, municipal ken barangay roads ditoy probinsya.
Iti nasao a public hearing ket indaulwan ti Committee on Transportation babaen kenni ABC Federated President Elmer Faylogna ken inatendaran dagiti kameng iti Ilocos Norte police provincial office, Land Transportation Office-Laoag, Land Transportation Office-Batac, Farmers association, ken members iti riders association iti Ilocos Norte.
Inbatad ni Faylogna nga iti nasao nga ordinansa ket inlungalong dagiti kameng ti Ilocos Norte Police Provincial Office (INPPO).
Inbatad ni Provincial Director Police Colonel Julius Suriben a napanunotan da daytoy kalpasan nga ado dagiti mairekrekord da nga aksidente nu sadinno a kaadwan ket saan a nakasuot iti safety gear.
Maysa kadagiti nasaludsud kabayatan iti public hearing ket no siassino dagiti mangmonitor ti panagsuot iti vest kangrunaan na kadagiti barangay roads.
Segun kenni Suriben, mapagsasaritaan paylaeng daytoy a banag babaen iti panakikammayet da kadagiti barangay officials iti intero a probinsya.
Kabayatanna, naipalaon iti ordinansa a no maaprubaran daytoy ket mapatawan ti multa a 500 para iti 1st offense, 2nd offense (1k) ken ti 3rd offense (1.5k) wenno ag-community service iti uneg ti pito nga aldaw.
Mainaig iti daytoy, inpetteng ti maysa a rider a ni Mr. Pjay Millare a para kenkuana ket saan a kasapulan ti vest basta nadisiplina amin dagiti agiturturong ti behikulo.
Innayon na a mabalin nga agusar ti vest ket dagiti agiturturong ti motorsiklo kangrunaan na dagiti agbibiyahe iti rabii.
Kuna na pay nga uray nakasuot ti vest no awan ti panagannad nga agmaneho ket dakkel latta ti posibilidad na a madesgrasya ti maysa a motorista.
