LAOAG CITY – Naituloy ti Public Housing Project ti probinsia nga inisyatibo ni dati a Governor ken agdama a Senador Imee Marcos babaen ti pannakikoordinar na iti National Housing Authority.
Segun kenni Vice Governor Matthew Marcos Manotoc, ti nasao a proyekto ket para kadagiti government employees kangrunaan na kadagiti agtrabtrabaho iti gobierno probinsial.
Kunana a daytoy ti rason no apay a nakikoordinar iti nasao nga ahensya, ken nagresultaan ti panangidonar ti probinsia ti 17,425 sq. Meters a daga nga isu ti pakaestablisaran dagiti balay.
Inbatad na nga innala ti National Housing Authority ti CSC Builders a developers no sadinno a daytoy ket addan iti maikadwa a phase ti Adigi Homes.
Innayon na a saan a nagundawayan ti probinsia gapu ta dagiti unit nga ilaklako ti nasao a kompanya ket para kadagiti pribado nga indibidual, ngem babaen ti pannakisaritana ket maiprayoridad dagiti empleyado ti gobierno probinsial.
Mainaig iti daytoy, tapno magundawayan dagiti empleaydo ti gobierno ket masapol a maikkan ti pammalubos ni Governor Cecilia Araneta-Marcos a makipinnirma ti maysa a katulagan iti nasao a developer babaen ti community based initiative approach financing scheme.
Kabayatanna, kalikagom ti bise gobernador a maamoan no ania ti background ti developer sakbay da nga ituloy ti nasao a proyekto.
