LAOAG CITY – Nagballaag dagiti nagduduma a grupo iti publiko kontra iti panagusar kadagiti 150 a klase dagiti imported nga spray paint gapu iti nangato nga antas iti makasabidong a lead.
Basar iti EcoWaste Coalition, International Pollutants Elimination Network ken Philippine Paint & Coatings Association Inc., mailaklako dagitoy iti online ken kadagiti merkado publiko.
Inbatad ti EcoWaste a 106 kadagiti 150 spray paint ket naglaon ti lead a sumurok iti 10,000 parts-per-million (ppm) idinto a dagiti dadduma ket lead level a manipud iti 50,000 ppm agingga iti 212,000 ppm.
Dumanon iti 90 ppm laeng ti limit daytoy nga inkeddeng ti Department of Environment and Natural Resources (DENR).
Basar iti World Health Organization (WHO), ti pannakaangot iti lead ket mabalin a mangitunda ti permanente a dakes nga epekto kadagiti ubbing nangruna iti central nervous system-da.
