LAOAG CITY – Inlawlawag ni Mrs. Judy Sabas, ti mangidadaulo ti Land Transportation Office (LTO) ditoy ciudad ti Laoag a maibilang a fixer dagiti agpopost iti social media a mangididiaya ti serbisyo mainaig iti panagparehistro iti behikulo.
Segun kenni Sabas, masapol a saan nga agpaluko wenno mamati kadagiti maibilang a fixer gapo ta nasken a masurot ti proseso iti panagparehistro ti lugan ken ti panangala ti lisensya.
Inbatad na a no dumalan iti fixer ti proseso ket nangin-ngina gapo ta sigurado latta a manayunan ti bayadan no ikumpara iti mabayadan no mapan a mismo iti opisina ti LTO.
Kunana a napinpintas no agturong a mismo iti opisina ken alisto laeng ti pannakaiproseso no laketdi kumpleto dagiti dokumento.
