LAOAG CITY – Inbatad ti maysa a political analyst a ni Professor Karl Lenin Benigno a ti panangala ti House Justice Committee iti Kamara de representantes ti Statement of Assets, Liabilities and Net Worth (SALN) ni Vice President Sara Duterte ket paset ti “evidence building face” iti impeachment process.
Inlawlawag na a nabayagen a paset ti impeachment complaints ti isyu ti kwestyunable a kinabaknang ti bise presidente, kasta pay ti maipagarop a saan a maikanatad a pannakausar ti confidential funds ti Office of the Vice President ken ti saanna a panangideklarar amin dagiti sanikua na.
Kuna na nga iti naisayangkat nga hearing ket naideklarar nga adda ti umdas a grounds ti impeachment complaint tapno ituloy ti hearing proper.
Nupay kasta, inpetteng ni Benigno a ti impeachment ket saan laeng a legal process gapu ta power struggle met daytoy iti nagbaetan dagiti political blocs no sadinno a ditoy pagilian ket ti Duterte vs Marcos Aligned Forces.
Innayon na a no dadduma ket maus-usar ti institutional mechanism kas iti impeachment process kas arena ti political contest.
Mainaig iti daytoy, kuna ni Benigno a no maiyuli iti senado ti articles of impeachment ket ditoy a makita ken maamoan no siasinno kadagiti senador dagiti napudno iti bise presidente.
Innayon na a saan met a maikkat iti panunot dagiti dadduma a Pilipino nga amangan no maus-usar laeng ti nasao a proseso tapno dadaelen ti bise presidente.
