LAOAG CITY – Inpakaammo ni Ms. Krizelle Guadalupe a tubo iti ili ti San Nicolas ngem agdama nga agnanaed ditoy siudad ti Laoag a pudno a narigat ti kabarbaro a sumrek iti negosio.
Segun kenkuana, masapol ti naan-anay a panagsagsagana kadagiti amin a kasapulan kas ti puunan, lugar a pakaipatakderan ti negosio ken dagiti empleado nga agtrabaho iti daytoy.
Inbatadna a no damdamo ket pudno a narigat ngem in-inot ket masursurona dagiti nasken nga aramiden iti panangtayyek ti kuarta iti negosio tapno saan a malugi.
Inlawlawagna a dagiti agpapaay nga empleadoda iti milktea shop ket dimmalan iti umiso a panagsanay tapno ad-adda a maipadanon ti napintas a serbisio kadagiti kustomerda.
Innayonna nga adda ti inaldaw a panagtataripnongda tapno ditoy a maammoan dagiti problema wenno pannubok iti negosioda.
