LAOAG CITY – Inpasigurado ni Philippine National Police Chief Rommel Francisco Marbil nga ikkaten iti serbisio dagiti pulis a karaman iti moonlighting wenno panangipaay ti private security kadagiti kandidato iti umas-asideg a 2025 midterm elections.
Daytoy ti inpasingked ni Marbil kageddan ti rakurak nga “strictly not allowed” ti nasao nga aramid para kadagiti pulis ken adda ti maiyannatop a pannusa a mabalin a mangitunda ti pannakaikkat iti serbisio ti asinoman a matiliwan a pulis a mangaramid iti daytoy.
Inbatad ni Marbil, nairanta laeng dagiti security escort nga inaprobaran ti Commission on Elections (Comelec) no adda ti lehitimo a threat wenno pangta iti biag ti maysa a pulitiko.
Nupay kasta, inlawlawag ni Marbil, nasken pay laeng a mapagsasaritaan dagiti pagannurotan maipanggep iti nasao a banag pakairamanan ti poll body ken agingga iti dua laeng a police escort ti mabalin nga ipaay iti maysa a kandidato.
Binallaaganna dagiti pulis nga aglabsing iti pagalagadan a maikkatda iti serbisio ken dagiti kakaduada nga aggandat a protektaran isuda ket makasoan met dagitoy.
Innayonna nga awan ti espasio iti Philippine National Police iti aniaman a klase ti panaglabsing iti organisasion.
