LAOAG CITY – Saanen nga agpila ti kaso ti Special Action Force officer a maipagarop a dinangran ti partner ni dati a President Rodrigo Duterte a ni Honeylet Avancena.
Daytoy ti inbatad ni Philippine National Police (PNP) Spokesperson Brig. Gen. Jean Fajardo.
Immunan a nagwaras dagiti ladawan ti maysa a pulis a babai no sadinno a makita ti kamuol iti mugingna kalpasan a maipagarop nga intuktuk ni Avancena ti cellphone na bayat iti pannakaarestar ni dati a Presidente Duterte.
Segun ken ni Fajardo, personal a desisyon ti pulis a saanen nga agpila ti kaso gapu ta ibilang na a karaman iti hazard ti trabaho.
Inpasigurado ni Fajardo nga adda iti natalged a kasasaad ti pulis ken agpapaimbag laeng sakbay nga agsubli iti trabaho.
Innayon na nga amin a kasapulan ti nadangran a pulis para iti panagpaimbag na ket ipaay ti Philippine National Police.
Mainaig iti daytoy, inpakaammo ni Fajardo a padayawan ti Philippine National Police ti nasao a police officer para iti serbisyo na.
